Fast trackimut qinnuteqarit pilertornerusumillu sulilersitsillutit
Fast trackimut siumoortumik akuersissummik pissarsiniaraanni suut piumasaqaataappat?
Sulisitsisutut nunanit allameersoq sulisoriniakkat Danmarkimi Kalaallit Nunaannilu sulisinnaanermut najugaqarsinnaanermullu akuersissummik pissarseqqaartariaqarnersoq eqqumaffigissavat.
Sulisitsisut avataanit tikisitsillutik sulilersitsiniarunik pilertornerusumillu suliaq ingerlanneqassappat, taava fast trackimik ingerlatsisoqarsinnaanissaannut qinnuteqarsinnaapput.
Fast trackimut siumoortumik akuersissummik pissarsiniaraanni suliffeqarfik piumasaqaatinik assigiinngitsunik naammassisaqaqqaassaaq:
- Atorfik imaluunniit atorfiit aalajangersimasut minnerpaamik ulluni 14-ini suli.gl -imi allagarsinneqarsimagunik, taava siumoortumik akuersissummik pissarsinissamut qinnuteqarsinnaapput.
- Suliffeqarfik Kalaallit Nunaanni pingaarnertut inissisimassaaq immikkoortortaqarfeqarluniluunniit.
- Akissarsisitsinermut atorfinitsitsiunermullu tunngatillugu Kalaallit Nunaanni pissutsit malillugit atugassaqartitsissalluni suliffeqarfik pisussaatitaavoq.
- Suliffeqarfik sulinermi avatangiisinut inatsimmi allassimasut sakkortuumik unioqqutinneqarneri pillugit sulianik Sullivinni nakkutilliisoqarfimmi, politiini eqqartuussivinniluunniit ingerlatsisoqaqqusaanngilaq.
- Suliffeqarfik nunani allamiut pillugit inatsimmik unioqqutsitsimanermut pineqaatissinneqarsimassanngilaq.
- Nunanit allameersumik atorfinitsitsiniarnermut atatillugu suliffeqarfiup qulakkiissavaa kommunimiut akuersissutit pisariaqartinneqartut pissarsiarineqarsimanissaat.
- Siliffeqarfik akiliisinnaajunnaarsimaqqusaanngilaq, imaluunniit akiliisinnaajunnaarneranut suliaq aallartissimaqqusaanani.
Fast trackimut siumoortumik akuersissummik qinnuteqarit
Sulisitsisutut atorfinitsitsiniarnermi massakkut pisuni suliffeqarfiit fast-trackimik atuinissaminut siumoortumik akuersissummik pissarsiniaruni, taava qinnuteqaammik allariarlutit nassiussissaatit.
E-maili atorlugu qinnuteqassaatit, ukulu imarissavai:
- Suliffeqarfiup CVR-ia taaguuraalu paasissutissiissutigissavatit
- Atorfiit akueritikkusutassinnut atorfininnermi isumaqatigiissutit kakkiutikkit
- Akissaatit atorfeqarnermilu atugassarititaasut paasissutissiissutigikkit - malugiuk Kalaallit Nunaanni atugassarititaasut assigissammatigit
- Isumaginninnermut, Suliffeqarnermut Nunamullu Namminermut Naalakkersuisoqarfimmut nassiuguk e-mail una atorlugu isn@nanoq.gl
Siumoortumik akuersissut pigeriikkat sivitsorniarukku, taava akuersissutip qaangiunnissaannut kingusinnerpaamik qaammatit pingasut sioqqullugit qinnuteqassaatit.
