Gå til indhold
Suliffissarsiortumut ilitsersuineq

Qinnuteqarnissannut CV-liorit

CV-mi paasissutissat ilinnut tunngasut pingaarnerit, soqutigisatit misilittakkattillu atuarneqarsinnaasarput, Taanna atorlugu sulisitsisup qanoq ittuunersutt takusinnaassavaa. Quppernermi matumani CV-liornissannut isumassarsiatsialaat immersugassallu takusinnaavatit, taamaalillutit suliffissarsisinnaalerlutillu ilinniarfissarsisinnaalissaatit.
Siunnersuutit

CV-liornissannut aallartigit

CV: Inuunerit misilittakkannit aallaaveqarpoq. Pingaaruteqarput.

CV suua?

CV-mi inuunerit tunuliaqutatillu takuneqarsinnaapput. Atorfimmik ilinniarfissamilluunniit qinnuteqarninni qinnuteqaatinnut ilanngullugu CV nassiussassaavoq.

CV-mi inuunerit qanoq ingerlasimanersoq takuneqassaaq. Misigisimasatit allaaserisariaqanngilatit, inuttulli sulisutullu imminut ilisaritinnissannut pingaarutillit kisiisa allassavatit.

Taamaattumik suliffigisimasatit, ilinniarsimasatit, misilittakkatit soqutigisatillu takuneqarsinnaassapput. Kajumissutsimik suliarisimasatit, sunngiffimmi sammisartakkatit ulluinnarnilu suliarisartakkatit ilanngussinnaavatit.

Sulisitsisup CV ima atortarpaa

Sulisoqarnermi siunnersortip aqutsisulluunniit atorfinitsitsisussap atorfinitsitsiniarnerminni CV misissugassani siulliukkajuppaat. 

Sulisitsisup CV-t misissorunik takupallassinnaasussaavaa:

  • Kinaanersutit
  • Sulerinikuunersutit - suut ilikkarsimaneritit
  • Suut pikkoriffigineritit 
  • Sorusunnersutit

Tassani kinaanersutit aammalu atorfimmut suliffimmullu tunniussinnaasatit suunersut takuneqartarput.

Taamaalioreerunik qinnuteqaatit atuarusulersinnaavaat immaqalu oqaloqatiginissannut aggersarsinnaallutit.

Taamaattumik soqutiginassaguit CV-liorluarsimanissat pingaaruteqarsinnaavoq.

Isumassarsiorit

CV-liornissannut immersugassat atukkit

Aallartinniarneq pisariusinnaavoq. CV qanoq isikkoqartarpa? CV-liassatut immersugassanik assersuutinillu katersinikuuvugut, taakkualu isumassarsiorfigilluakutsoorsinnaavatit. Immersugassat aallartinniarninnut iluaqutaasinnaapput. Allanngortissinnaavatit taamaalillutik ilinnut misilittakkannut oqaatsinnullu atortakkannut naleqqussarsinnaavatit.
Immersugassat nanikkit

CV-p pitsaasup imarisai 

Sulisitsisorilersinnaasavit piffissarujussuaq atornagu CV-t qimerluualaarsinnaassavaa - ajornanngippat sekundit 30-t iluanni. Taamaattumik CV quppernermik ataatsimik marlunnilluunniit taamaallaat takissuseqartarpoq.

CV atorlugu sulisitsisup sulisutut kinaanersutit tunuliaqutitillu paasiniartarpai. 

Pingaaruteqarpoq ersarissumik, paasinartumik, ilisarnartumik qimerluualaarneqarsinnaasumillu allannissat.

CV nalinginnaasoq ataani allassimasunik imaqartarpoq, taamaalilluni sulisitsisup CV ilisarisinnaassavaa atuapallassinnaassallugulu: 

CV-liornissannut eqqaamasassat

CV nalinginnaasoq ukunannga imaqartarpoq, taamaalilluni sulisitsisup kinaanersutit tunuliaqutillu takupallassinnaassavaa. Ukua eqqaamanerlugit misissoruk:

  • Attavissat
  • Naatsumik inuttut, sulisutut ilisaritinnerit aammalu suna kajumiginerlugu allassavat - piumaguit assitalersinnaavat
  • Sulisutut inuttullu piginnaanitit ersarissassavatit
  • Suliffigisimasatit (kingullermiit siullermut tulleriaallugit)
  • Ilinniarfigisimasatit (kingullermiit siullermut tulleriaallugit)
  • Piginnaasat allat (ass. kajumissutsimik suliat pikkorissarnerilluunniit)
  • Allat, inuuninnut attuumassusillit (ass. sunngiffimmi sammisartakkatit soqutigisatit, ilaquttatit allatulluunniit fun facts immikkuullarissut) 
Siunnersuutit

CV-t atorfimmut naleqqussaruk

Pisortasat ikiorniarlugu CV-liuleruit CV-t atorfimmut suliffeqarfimmulluunniit qinnuteqarfiginiakkannut naleqqussarsinnaavat. Taamaaliornissannut soqutigisatit misilittakkatilluunniit atorfimmut naleqqunnerpaasut ersarissassavatit. Immaqa nutaaliorneq iluaqutaasinnaavoq? Naleqassuseq pilersissinnaasat ersarissaruk.